繼續同大家介紹香港墳場內開埠初期嘅人物，繼早前同史友們講過叔何顯理同埋何啟嘅生平故事之後，今次要介紹嘅人物有啲特別，事關喺佢生前係牽涉唔少醜聞。
如果史友們有見過高和爾嘅墓碑，應該都會發現到兩組好特別嘅圖案，就係好似直角尺同埋圓規咁，而呢兩組圖案其實就係共濟會成員先可以用。共濟會亦都唔係一個普通組織，過往香港就有羅便臣、麥當勞和卜力三位總督都係會員，呢位高和爾其實係香港開埠初期嘅中上層官員，因為通曉多國語言而令佢建立到唔少人脈，足以加入到共濟會。
佢本身係出生喺聖赫勒拿島，喺新加坡長大，因為第一次鴉片戰爭爆發而跟住英國艦隊嚟到中國充當翻譯員，後來就定居香港，先後喺裁判司署同埋最高法院擔任傳譯，亦都係因為佢可以同華人交流嘅緣故，冇幾耐佢就做埋助理警察司，任內打擊唔少海盜。
咁問題嚟喇，睇落好似幾正常嘅一個人物，點解會發生一單醜聞呢？原來高和爾覺得政府嘅工作人工太低，曾經要求加人工但無得到回應。佢曾經辭職後來又得到總督寶靈重新聘用出任總登記官兼撫華道。佢就曾經同黃墨洲合營船運業務，其實就係暗中勾結海盜、收受賄賂、包庇娼妓，當時就曾經喺佢屋企搵到雙方錢財來往字據。
時任嘅警司查理斯．梅(Charles May)就將呢啲證據上交，但由於佢嘅上司代理輔政司必列啫士同高和爾係好朋友，所有證據就被燒毀，即使後來港督寶靈委任總測量官急庇利（共濟會成員）成立委員會調查，但都係以證據不足為由，只係因為其他指控將佢革職就結案。
呢件就係當時被稱為高和爾醜聞，直到新任港督羅便臣上場之後，先至重新喺1860年8月13日展開調查，最後於判決高和爾勾結海盜罪罪名成立，並宣佈革除公職。
原圖嚟自網絡
評論：
共0 條評論