【講開有段故】香港第一間華資百貨公司——先施百貨

近排因為疫情嘅關係，唔少人都少咗出門購物，現代就相當方便，有乜想買都可以通過手機應用程式去買，但如果係上個世紀想多幾款唔同貨物又可以點做呢？答案就係去百貨公司喇！

百貨公司最早就喺歐洲19世紀嘅晚期出現，並且已經發展到幾大規模，而講到香港最早期嘅百貨公司，阿史就想介紹下第一間華資百貨公司先施百貨。呢間咁百貨公司喺1900年1月8日由喺澳門開果欄發達嘅香山籍華僑馬應彪創辦，當年喺香港創落唔少壯舉，係早年最大規模嘅百貨公司，後來就同永安公司、新新公司、大新公司合稱四大公司。呢四間百貨公司都有一個共通點，就係都係由香山人設立，而所謂香山就即係中山。

第一間嘅先施百貨就係設立喺中環皇后大道中嘅一個鋪位，由於業務發展嘅關係，去到1917年就已經搬到去上環德輔道中173至179號，而呢個地點係一棟6層高嘅大樓，亦都係香港第一棟有升降機嘅大樓，先施百貨當時幾有財大，大概都可以想像到。

頭先阿史都提到，先施百貨當年創咗唔少壯舉，唔知史友們又有冇聽過呢？最經典就係第一間公司提出不二價同埋收據、而且仲係第一間以女售貨員提供售貨服務嘅機構、後來亦都牽頭舉行過瘋狂大減價等等嘅活動。今時今日唔少大家見慣嘅活動，當年都係由先施首創，真係估佢唔到！

原圖嚟自網絡