冇幾耐之前阿史就同大家介紹過共和國勳章，近排就有鍾南山院士因為抗疫有功而獲頒呢個現行國家勳章同國家榮譽制度最高一級嘅獎項，而呢個勳章以往都有唔少猛人曾經拎過，其中一位就係曾獲兩彈一星功勳獎章、「中國氫彈之父」——于敏。

于敏先生出生喺1926年嘅天津，早喺讀高中嘅時候就被發現成績優異，即使後來被推薦轉學到天津嘅一所名校耀華中學，佢都仍然做到每科都拎第一名，結果佢後來就成功考入北大嘅工學院，由工學院機電系轉讀理論物理，1951年仲做埋中國科學院近代物理研究所任助理研究員,，開始核理論研究工作。

喺于敏研究核武器理論嘅過程中，于敏就只係依靠住簡陋嘅設備，就解決咗氫彈自持熱核燃燒嘅問題，由原理、材料去到結構都準備完成。於是，去到1967年6月17日，第一粒由中國製造嘅氫彈喺西部地區成功引爆，中國用咗2年8個月嘅時間完成呢件事。至於去到80年代，于敏同佢嘅團隊又再次喺二代核武器嘅研發取得突破，進行咗45次嘅核試驗就已經取得成功。

雖然于敏同佢團隊完成咗一件又一件壯舉，但其實喺佢研究生涯入面，長達28年佢都係隱姓埋名，早年即使係佢嘅家人都唔知道佢從事呢項咁秘密嘅工作。直到1988年佢先唔使再隱姓埋名，1999年嘅9月，于敏正式被授予兩彈一星功勳獎章，呢個時候世人先知道佢係「中國氫彈之父」。

2019年1月16日，于敏因病喺北京去世，享年93歲。

原圖嚟自網絡