尋日阿史就同大家介紹到喺北美仲未立國之前，北美大部分嘅土地都係英國嘅殖民地。作為宗主國嘅英國，當然就會喺殖民地謀取最大嘅利益，於是當時就引發咗一個抗英組織出現，呢個組織就係「自由之子」喇！

提到「自由之子」最威水嘅事，除咗係促使《印花稅法》嘅廢除之外，仲有嘅就係波士頓茶黨事件。喺1773年，英國政府為咗挽救充滿危機嘅當印度公司，直頭公布一項法案宣佈特許東印度公司可以壟斷所有北美嘅茶葉進出口貿易。

要記住喺當時17世紀嘅英國，甚至係歐洲都相當沉迷茶葉，英國呢個徵收巨額稅項嘅舉動令到北美嘅人相當不滿。其實早喺17世紀英國就已經壟斷咗成個北美嘅茶葉供應，但經過一連串抗議活動令到每磅茶葉只係需要交三便士稅。但係1773年嘅呢條《茶葉法案》就令到東印度公司可以直接喺北美銷售茶葉，令到大部分殖民地茶葉分銷商基本上再冇生存空間。

於是，喺1773年12月，民間反抗組織「自由之子」領導行動，分成每組五十人，將船載東印度公司茶葉嘅船隻搗毀，將342箱接近18,000英鎊嘅茶葉倒入港口內，當時佢哋仲喬裝成印地安人。對於呢件事件，英國震怒，仲推出一系列「強制法案」加強控制，結果就引發美國獨立戰爭，詳情下篇再同大家介紹。

原圖嚟自網絡