【講開有段故】慈禧太后殮葬着啲乜？

呢排都同史友們講唔少晚清嘅故事，慈禧太后生前有幾巴閉相信唔使阿史講大家都會知，但死后點樣殮葬同樣都可以令世人知道佢嘅權力，今次阿史就同大家介紹下呢位權傾幾代帝王、垂簾聽政嘅慈禧太后殮葬到底着啲乜。

近排喺中國絲綢博物館就有一個「後宮遺珍——清東陵慈禧及容妃服飾修復成果展」，雖然依家疫情關係大家都去唔到當地睇，但淨係睇相都可以感受到果種氣勢。呢個展覽就公開咗幾件修復咗接近8年嘅慈禧陵寢地宮出土服飾，當中慈禧身穿嘅服飾規格仲勁過皇帝件龍袍。

據中國絲綢博物館嘅還原同埋修復，慈禧太后當時身穿嘅殮服同埋絲質殮葬品一共有七件，分別係「黃江綢繡五彩五蝠平金佛字女龍袍」、「雪青緞平金繡團壽女夾袍」、「綠縐綢平金繡福字女夾衣」；而喺佢身下嘅係一件「鋪絨加金絲繡荷花褥」，屍身就蓋住「陀羅尼經被」、頭枕「堆綾荷花枕套」同埋著住一對「串珠堆綾彩繡荷花鞋」。呢身造型除咗充分反映到佢本人嘅信仰，仲可以見到「黃江綢繡五彩五蝠平金佛字女龍袍」上面足足用咗盤金繡繡咗幾十個佛字，規格仲勁過皇帝件龍袍。

歷史上慈禧太后定東陵陵寢相當奢華，歷時六年嘅動工足足用咗500幾萬兩，只係去到1928年被軍閥孫殿英盜掘掠走全部隨葬珍寶，而呢啲絲質品就被拋到入地宮之中先得以保留。

原圖嚟自網絡