嘩嘩嘩!所謂三十年河東三十年河西,四十年前同香港一河之隔嘅深圳,今日繁華程度同香港真係差唔多,而呢個地方响過去四十年嚟都係唔少人追尋夢想嘅地方。40年前嘅今日,深圳經濟特區正式成立。

七十年代末文革結束後,鄧小平復出執政,可開始落實改革開放政策。1979年,中共中央同國務院同意响廣東省嘅深圳、珠海、汕頭,連同福建廈門市試辦出口特區,後尾改稱為經濟特區。1980年,全國人大常委會正式批准設立深圳經濟特區。簡單而言,深圳市就係响呢個時候發展起嚟。

深圳之所以得以走向繁榮,主要係受惠於改革開放政策。八九十年代深圳市對港商提供咗唔少優惠,唔少香港廠商都離開香港北上開廠,推動深圳市工業同商業發展。另外,深圳响八九十年代當年推出咗好多相當大膽同創新嘅政策,其中一個就係賣地。前深圳市委書記李灝憶述,响八十年代要發展基建,開支好大,當時有一個港商教班官講:「錢可以從土地中來」經研究後就促成咗拍賣土地呢個政策。

今時今日嘅深圳,已經成為全球重要創科城市之一,甚至好多香港後生仔都願意北上發展事業。

原圖嚟自網絡