早幾日就同史友們提到一個消失嘅古國古蜀，唔少史友都覺得幾有趣，想阿史再講多少少，咁今日阿史就同大家介紹下呢個被認為構成古蜀嘅考古學文化遺址，三星堆遺址。

三星堆遺址位於四川省嘅廣漢市，距離成都接近40公里，由此呢個區域嘅考古學遺址係由三個相連嘅黃土堆組成，所以就被稱為「三星伴月」，亦都叫做三星堆。據考古學家推斷，呢個遺址係喺公元前2800年至到公元前1110年之間，如果將古蜀文化分成四期，三星堆嘅呢個遺址就係屬於古蜀文化嘅第二期同埋第三期，現時三星堆就已經係第三批全國重點文物保護單位，而且仲申請緊成為世界遺產。

可能有史友會好奇，到底呢個咁神奇嘅遺址係點樣被發現呢？原來喺1929年嘅時候，廣漢縣就有一位村民喺屋企挖蓄水溝果陣發現到一個放滿400幾件玉器嘅坑道，冇幾耐佢就將呢批玉器賣出去。當時就先畀一位軍隊旅長發現到呢個位置，率先展開挖掘。

而後來仲有一位叫做龔熙台嘅金石學家發現到呢批玉器，寫咗一篇《古玉考》嘅文章，隨即就令到廣漢地區掀起挖掘潮。雖然當時嘅廣漢縣縣長下令禁止私人亂挖，但仍然有唔少玉器文物喺當時已經流失咗。直到1934年3月15日，華西大學派出考古隊喺呢一帶進行發掘，先至開展正式嘅考古發掘工作。

三星堆滿佈房屋基址、墓葬，當中出土既有陶器、石器、玉器文物、仲有唔少青銅器，足足分咗五層嘅文化層，認真誇張。由於當時唔少青銅器物造型都好特別，就好似青銅立人像、青銅神樹、青銅縱目面具等等，歷年嚟都有人戲稱呢個遺址係外星人嘅遺址，而當中都仲有唔少未解之謎，好值得大家去研究。

原圖嚟自網絡