如果史友們有去過深水埗公園,可能都會喺公園範圍度見到有「軍部地界石」,呢類型嘅地界石並唔係失驚無神咁設立喺果度,而係呢個公園以前真係做過一個軍營。

其實早喺20世紀初,港府就已經喺深水埗北河街同埋桂林街之間與建差館,當時呢個差館唔單止係用嚟維持區內治安,就連荃灣都係佢嘅管轄範圍。要知道早年嘅深水埗真係海邊嚟嘅,所以當時差館仲係船政司辦事處,監測九龍西面水域。

咁軍營又係幾時出現呢?喺1925年,正係省港大罷工嘅時候,當時英國人就擔心自己喺香港嘅利益受到影響,就已經諗緊點樣應對未來類似嘅事件。於是喺1927年就派咗一支軍隊嚟到香港,並且同年設立深水埗軍營。呢個軍營位於福華街、欽州街、通州街同埋東京街,範圍相當大,仲分成漢口同埋南京兩個營房,入面有超過一百座嘅建築物。

亦都係因為呢個軍營面積咁大,去到日軍侵佔香港之後,深水埗軍營亦都變咗做集中營,接近7,000個守軍被俘並且送到嚟呢度囚禁,唔少戰俘當時因為惡劣嘅環境而患病,病死喺軍營入面。

戰後,深水埗軍營就恢復軍營用途,但去到1977年就送還土地畀港府,曾經做過越南難民營,後來就改建成麗閣邨、怡閣苑、深水埗公園同埋西九龍中心,原址就留有三塊「軍部地界」石碑同埋牌匾,紀念喺戰俘營逝去嘅人。

原圖嚟自網絡