開辦非專利巴士路線起家嘅——城市巴士

近排就流傳住一單幾令巴士迷關注嘅消息，就係新巴同埋城巴將會出售業務，而接手嘅財團亦都係呢件事嘅一個焦點，事關呢個Ascendal財團喺英國只係有45架巴士，但一舉之下就收購咗有過千架巴士嘅兩間公司，認真誇張。兩巴嚟講對唔少香港市民都係好重要嘅回憶，咁阿史今次就先同史友們回顧一下城巴啦！

城巴亦即係城市巴士，現時係香港五間專營巴士公司之一，目前就有116條巴士路線。呢間公司喺70年代尾就由當時中巴嘅交通部經理李日新同埋佢朋友一齊創立，最初就係靠幫香港船塢嘅員工提供接送服務維持公司嘅運作。咁到底呢間公司係幾時先起家呢？原來同新市鎮發展有關。

去到80年代，由於港府大規模發展新市鎮，但當時呢啲新市鎮嘅交通都仲未係好完善，要出入市區並唔係一件方便嘅事。於是，當時城巴就開辦居民巴士線，最早期嘅一條路線就係由沙田第一城去到九龍塘地鐵站，自此就陸續開辦更加多條路線。去到80年代尾，城巴仲喺英國引進埋雙層冷氣巴士，後來就成為埋市區巴士嘅主流，仲喺1991年拎埋第一條港島巴士路線（12A號線）專營權，成為擠身專營巴士公司行列之一。