三年零八個月有個「香島放送局」

早排阿史都同大家介紹唔少香港開埠初期嘅中、英文報紙就好似《遐邇貫珍》、《德臣報》等等，而喺上世紀嘅20年代，第一個民間電台亦都以「ZBW」嘅台號現身，可以話當時各種紙媒同埋電台廣播都有一定嘅發展。咁到底戰時，特別係三年零八個月呢段日子，廣播業報業又有咩變化呢？今次阿史就同大家介紹下日佔時期嘅一個宣傳工具——「香島放送局」。

其實早喺日軍準備侵占香港嘅時候，香港嘅電台廣播就已經被迫中斷，而到日軍控制咗香港之後，對報業同埋廣播業都展開大規模嘅規管，當時就成立咗一個負責用廣播宣揚「大東亞共榮思想歌曲」嘅部門，當時凡係有收音機嘅市民都需要登記，係相當嚴格嘅管制。「香島放送局」會用電台推廣日文同埋日本文化，就好似圖入面張宣傳照咁，提倡當時嘅香港市民要好似日本人咁做早操運動。

而去到戰爭後期，「香島日報社」亦都出現，專門就係發行一啲「東亞政局概論」、「東亞戰局」、「世界動向」嘅文章，但隨住日本投降之後，「香島日報社」就停止運作；至於「香島放送局」就改名做「香港廣擂電台」，後來仲成為廣播處掌管嘅電台。