有揸開車經過油麻地一帶嘅史友們可能都會知道呢件事,就係接近五十年歷史嘅油麻地停車場大樓因為要配合中九龍幹線工程,將會喺今年拆卸。呢單消息就引嚟唔少朋友感慨,紛紛都表示對呢座大樓好唔捨得。

咁又係嘅,事關油麻地停車場大樓真係幾有特色。呢座建於1970年10月13日嘅公眾停車場,位於油麻地上海街,係當年市政局為咗建決當區泊車問題而訂立嘅計劃之一,早期呢座大樓並唔係全部都係停車場,反而有一部分係圖書館用途。直到1972年9月,政府就宣佈擴建停車場,喺原有停車場旁邊興建一座11層高嘅停車場。

講咁耐,到底阿史想講嘅特色係咩呢?之唔係原來呢座停車場係連接住一條行車天橋,大家冇睇錯呢座建築物真係連住加士居道行車天橋,成個設計真係相當罕有。實有人會問,到底有停車場先定係有天橋先啊?呢個問題就比較難答喇!

事關停車場大樓係分兩個階段建成,第一階段就係北面嘅大樓,喺70年代初就已經建成;至於加士居道天橋就係喺1977年之後先同大樓合併,成座建築就係80年代先至起好,所以有橋先定有樓先,真係睇大家點理解。

原圖嚟自網絡