提起以數字命名嘅街道,相信唔少史友可能都會諗起港島西營盤嘅第一街、「新蒲崗八街」,而唔講大家可能都未必知,原來油麻地以前都有過數字街嘅存在。

喺19世紀嘅70、80年代之間,當時港府就打算發展油麻地,但由於當時近海一帶地勢就唔係咁有利建築,於是就先對海邊嘅沼澤海灣進行填平,再沿住原本嘅海岸線進行填海,令到原本只係海傍道嘅地面延伸到新填地街。喺呢次發展得出嚟土地就被規劃做街道,後來起咗各式各樣嘅建築物,而最早期呢批街道並冇一啲特別嘅名,就好直接咁叫做第一街(甘肅街)、第二街(北海街)、第三街(西貢街)、第四街(寧波街)、第五街(南京街)之類,如是者就數到去第八街,即係寶靈街。

咁點解好地地會由數字街改咗做依家嘅街名呢?原來當時港島都有唔少呢類貪方便嘅數字街,就咁講第一街可能全港都有好幾條,容易混淆。於是去到1909年,港府先至刊憲整理九龍街道名並且對呢啲街道逐步重新命名。

原圖嚟自網絡