講到深圳特區,老一輩深圳人都會記得一位老市長嘅名字,佢叫梁湘。佢可以話係深圳發展嘅先鋒之一,亦係拓荒者。

梁湘响1981年到1985年出任深圳市長,1981年,62歲嘅佢赴任深圳市長。雖然當時深圳要發展經濟特區,但梁湘以至市政府都係資源欠奉,因為中央政府講明「只給政策不給錢」。無錢但又要做出成績,當時嘅人就笑梁湘係最苦嘅苦官。另一方面,當時係改革開放初期,國內政治氣氛仍然好保守,所以梁湘好多大膽手段同政策都被人批評。好似無錢起公路,佢就將土地承租俾香港發展商,結果惹嚟好多批評,甚至官媒有文章批評佢嘅做法。

1984年1月,鄧小平南巡,到咗深圳後就聽梁湘報告,之後仲上咗國際商業大廈天台睇下深圳市發展狀況。不過鄧小平响深圳就無講太多說話,搞到梁湘擔心係咪鄧小平唔多滿意。之後鄧小平去到珠海,仲題字「珠海經濟特區好」,呢幅題字就令梁湘更加擔心,於是就派人去廣州,提出要鄧小平為深圳題字,不過鄧小平回覆就係「回北京再提吧」。結果呢位深圳特派員就跑到去北京,最終鄧小平响過年時為深圳題字。鄧小平為深圳題字,證明佢滿意深圳發展嘅狀況,令梁湘鬆一口氣。

原圖嚟自網絡