早前阿史介紹到開埠早期嘅共濟會成員高和爾果陣,就有提到佢當年嘅一單醜聞,內容就有概係佢當時同一個叫做黃墨洲嘅人相互勾結,黃墨洲就利用高和爾打擊海盜從中取利;而高和爾亦都借黃墨洲通風報信立功。事後高和爾就因為有唔少友好官員幫手而成功清除罪證、干擾證人作供,就算上到法庭都冇事,呢件就係1857年開始嘅「高和爾醜聞」。

可能有史友會問,到底呢位黃墨洲係咩來頭,同咁多海盜有關係,甚至自己食唔少大茶飯?

黃墨洲嘅身份一啲都唔簡單,呢位1822年出世嘅廣州人,盛傳佢原本係一位滿清派駐香港嘅秘密偵探,表面上就係一個商人,但實際同唔少官員有來往,甚至仲做過香港仔警署華人警長,黑白兩道佢都熟晒,後來仲幫過海盜販賣賊贓,從事「賣豬仔」生意。而最「沙膽」嘅一次,就係想去洗劫新安縣南頭縣城,只係最後失敗咗咁解。

喺佢作奸犯科期間,佢就識咗高和爾,佢既係高和爾嘅「契爺」,同時佢仲送咗個契女畀高和爾做情婦,所以就算後來高和爾成功脫罪,都仲有幫黃墨洲辯護。黃墨洲最後就冇咁好彩,經過審訊最終被判其15年徒刑,充軍出境。呢件「高和爾醜聞」事件去到1861年就有新嘅進展,高和爾就因為被裁定「與黃墨洲勾結」罪名成立,即時革職;至於原本已經被流放嘅黃墨洲,就喺1869年特赦回港,隱居去到1892年過身。

原圖嚟自網絡