對文物保育界嚟講，近排又有一單好震撼嘅消息，就係被列為一級歷史建築嘅皇都戲院大廈就獲土地審裁處批出強拍，底價仲達到47.76億元，換言之「皇都戲院大廈」基本上好難保持原狀，至於點樣保育就仲未有定案。

皇都戲院大廈喺1952年落成，呢座由住宅、商場同埋戲院組成嘅大廈有唔少特別嘅地方都深受文物保育人士熱愛。皇都戲院係現存罕有嘅舊式大戲院，成座大樓最先建成嘅部份就係戲院，商場同埋大廈就係1959年先落成，既見證咗香港娛樂事業嘅高峰，又係唔少市民生活嘅集體回憶。

皇都戲院前身最先係璇宮戲院，佔地三萬平方尺，座位超過1300個，當時嚟講已係算係相當軍有，仲有唔少知名歌舞團、音樂會都會喺度舉辦，呢度就被視為係香港50年代嘅「大會堂」。至於去到50年代後期，璇宮戲院就易手並且改名叫做皇都戲院，主力播放西片同埋國語片，陪伴市民度過70、80年代嘅港產片高峰期。而去到1997年2月28日，皇都戲院亦都播出最後一部電影「一個好人」，然後就改咗做桌球城會所。

冇見過呢座戲院嘅史友可能會問，到底呢座戲院仲有咩好睇？其實就咁離遠睇，都會見到正門對上嘅「蟬迷董卓」浮雕，出自著名畫家梅與天，代表咗當年嘅美學；而喺建築特色方面嚟講，屋頂位置就有一個被譽為係全球獨一無二嘅拋物線型桁架，唔少外國保育組織都大讚呢個設計。唔知強拍之後嘅皇都戲院大廈又會點樣保育呢？

原圖嚟自網絡