中國古代常見嘅獸類形象——狻猊

有研究開傳統中式建築嘅史友可能都會知道狻猊係啲乜，事關喺唔少中式建築嘅屋脊、門前嘅石像、甚至係香爐或者佛像，都會有佢嘅蹤影。圖入面呢隻猛獸叫做狻猊，相傳仲係龍生九子之一，有指係排行第五，又有講法話佢係排行第八。

喺《爾雅》、《穆天子傳》入面記載，狻猊形象就好似獅子咁，鍾意吞煙吐霧、喜靜不喜動，所以喺唔少香爐佛像都會有佢嘅形象；而且狻猊仲係好好腳力，好為食，連虎、豹都係佢嘅食物之一，所以亦都係寓意住統率百獸。古代中國國土內其實就冇獅子，咁到底點解會有呢種同獅子咁相似嘅獸類形象呢？據現代學者分析，古代中國嘅獅子主要都係由印度、波斯引進，而「狻猊」呢個詞本身可能係冇意思，純粹係印度語言或者古代西域語言上嘅音譯。

喺古代嘅建築同埋工藝品上，經常都會見到狻猊嘅形象，最值得留意就係香爐同佛像上嘅狻猊。事關喺佛教嘅理解嚟講，狻猊「平生好坐，今佛座獅子是其遺像」，亦都係象徵嘅佛陀；而喺法座上面畫狻猊形象。亦都係表示對高僧嘅尊敬，所以又有「獅子座」、「狻猊座」或者「猊座」呢啲叫法。