早排阿史就講到內地近排就有一個「後宮遺珍——清東陵慈禧及容妃服飾修復成果展」，當中展出咗經過修復之後嘅慈禧殮葬服飾，規格上嚟講仲犀利過皇上件龍袍。但仔細啲諗，點解慈禧嘅殮葬服飾會被破壞，仲有隨身嘅陪葬品又去咗邊呢？呢啲疑點都同一個人有關，就係民國初年軍閥孫殿英。

孫殿英嘅一生認真「傳奇」，佢出生喺1889年，幼年喺私塾讀書果陣因為畀老師鬧咗幾年，7歲之齡就放火燒咗間私塾。結果就當然被退學，仲做埋少年賭徒、染上鴉片菸癮。後來，佢就成為咗一個民間組織「上仙廟道會」嘅話事人，仲帶埋會眾加入河南陸軍第一混成團，展開佢軍隊嘅生涯。喺直奉戰爭入面，佢不斷壯大自己勢力，既擴大隊伍、亦都乘機掠奪。

講到佢嘅軍閥生涯就經典喇！佢先係為直系軍隊、後來就入過國民軍、奉軍、國民革命軍、汪精衛政府，最後又歸順蔣介石，成為國民革命軍中將。問題嚟喇，點解佢又會冇啦啦會去盜掘清東陵呢？

原來對孫殿英嚟講，清政府算得上係佢世仇，由祖先計起佢聲稱係抗清名臣孫承宗後裔，而佢父親據講亦都係同八旗子弟爭執最後被困獄中慘死。於是，佢喺1928年向蔣介石投降之後就去到清東陵，以軍事演習為名用咗幾個月時間盜掘乾隆皇帝與慈禧太后陵墓，面對住打唔通嘅「金剛牆」，佢就直接用炸藥，結果後來就令到東陵入水，唔少字畫文物都被破壞。至於陵墓入面嘅寶物，據講被佢運走咗三十幾車，慈禧珍珠鳳冠、巨型夜明珠通通冇晒，而慈禧太后、乾隆屍身更加被拖咗出嚟。

面對住孫殿英呢種盜竊墓穴嘅行為，社會輿論都係一致指責佢，但佢當時就落足本錢行賄民國上下人等，結果呢件事亦都不了了之，間接令到溥儀同國民政府完全決裂。呢位咁「傳奇」嘅人物，喺國共戰爭中被解放軍所俘，1948年毒癮發作身亡。

原圖嚟自網絡