繼續同史友們介紹香港嘅公共屋邨，早排就同大家介紹過由徙置區重建之後嘅樂富邨，而同樣喺黃大仙區入面，就有一座好有象徵意義嘅公共屋邨——美東邨。

美東邨位於東頭村道同埋聯合道交界，喺70年代初政府就想擴闊東頭村道並且興建「東頭政府廉租屋邨」（即係依家嘅美東邨），於是就想同四村村民收地，雖然經過一輪反對，但最後都成功可以遷拆潮平新村、東和村兩條平房村落。

美東邨喺1972年動工，屬於第七型嘅廉租屋邨，第一棟美東樓就喺1974年7月落成，當時係叫做第6座。講起呢條邨就真係有樣野大家未必會知，呢條公共屋邨其實係1973年4月香港房屋委員會成立之後第一條落成嘅公共屋邨，而屋邨入面就只係得一座樓宇， 時隔七年之後先開始加入其他樓宇，但美東邨總數都只係得四座樓宇。唔單止咁，美東邨當中嘅美東樓、美寶樓因為鄰近啟德機場高度限制圈，所以樓宇高度唔可以超過十二層。

由於以上幾樣限制，就令到美東邨成為當時全港最小型公共屋邨；而且由第一棟去到最尾一棟嘅大樓落成，足足差距40年，亦都係全港建設期最長嘅屋邨，所以喺美東邨其實可以搵到4款唔同時期嘅設計，相當難得。

原圖嚟自網絡