依家大家要睇月曆完全唔係一件難事,無論係手機嘅月曆定係實體牌都好方便,而喺舊時月曆多數係叫做月份牌,最初就係由華洋商出品用嚟宣傳商品,亦都可能因為咁,當年嘅月份牌就真係整得好靚,甚至仲有專門嘅畫家繪製。

月份牌係清末民初上海嘅一種廣告宣傳畫,內容其實都係有中國節氣表同埋日曆表牌,但華洋商為咗推銷商品,一般都會搵專業畫家畫一啲靚女、明星同埋歷史人物之類,用嚟推銷香煙、百貨同埋各類商品。月份牌一出現就已經相當流行,並且喺20、30年代最為興盛,流傳到全國各地,依家仲係上海嘅非物質文代遺產。

咁同香港又有咩關係呢?其實唔講真係未必知,香港當年就有一位「月份牌大王」。阿史所講嘅其實就係關蕙農,佢出生喺廣東南海,佢太爺關作霖其實就係19世紀一位好出名嘅外銷畫家「林呱」,所以關蕙農自細就學唔少西洋畫,到大個就跟咗嶺南畫派大師居廉學習國畫,學識唔少傳統畫作嘅技藝,就好似「撞粉」及「撞水」。

喺1905年,關蕙農移居香港,憑住自己多年學到嘅繪畫技術,投身月份牌創作,自己嘅作品結合東方同西方特色,將西洋光影融入中國水墨,又喺國畫上面突顯出西洋畫人物形體,當年佢畫出嚟嘅人物極具柔美、豐腴嘅感覺,最具代表性嘅當然就有「雙妹嚜」,完全創咗商業廣告畫法嘅先河。於是佢就被公認為「月份牌大王」,就連高劍父都徵用過佢嘅作品返上海。

原圖嚟自網絡