呢排阿史都同史友們講唔少日軍入侵香港所爆發嘅戰事,而喺三年零八個月期間,亦都有唔少慘劇發生,就好似早前介紹過,日軍將幾百個香港居民放到螺洲上自生自滅,最後仲出現人食人嘅慘劇。原來呢啲慘劇嘅爆發,係同「歸鄉政策」有關。

喺日本佔據香港之後冇耐,佢哋就意識到一個問題,香港本地係冇乜資源,好似白米同埋其他必需品都好依賴入口,但就因為戰爭而令到交通中斷,香港糧食供應就出現咗好大嘅問題。於是喺1942年1月,日軍政府民治部就成立「歸鄉指導委員會」,每月都有安排火車同埋船隻去將市民送走,當時目標係想將香港人口由160萬減到去50萬。

喺「歸鄉政策」初期,日軍就以勸諭同利誘等方式令居民離開香港,肯離開嘅甚至仲可以拎到白米,但去到1942年中期,「歸鄉政策」效果未如理想,日軍就直頭用到強硬手段,直接喺街上捉人送出境外,後來嘅居民證制度亦都係因為呢件事而起。

而去到1945年8月,香港大約得返60萬人,唔少人離開咗香港,但途中就有唔少餓死、病死,小朋友同老人家被拋棄,甚至係被日軍斬殺。戰後唔少地方好似馬鞍山、墨魚洲就有搵到當時嘅萬人塚,相當慘烈!

原圖嚟自網絡