尋日阿史就講到深圳經濟特區嘅成立，最初係源自鄧小平外訪新加坡，發現到呢個土地面積唔大嘅國家竟然可以有咁先進嘅技術同埋外國嘅投資。咁就有唔少史友提到，講到深圳經濟特區一定要提一個人，呢個人就係袁庚喇！

喺講到袁庚之前，當然係要講下「蛇口模式」先！蛇口其實就係深圳南山嘅一個工業區，但係喺成個深圳仲未完全發展之前，蛇口工業區先係中國第一個對外開放嘅地區，並且喺區內設有唔少現代化嘅設施就好似廠房、商業大廈、住宅及港口等等，當年真係諗都冇諗過，甚至見都未見過。而所謂嘅「蛇口模式」就係對於成個蛇口經濟發展特徵同埋管理體制嘅概括，係以企業獨立發展、建設為主，即係以「工業為主，積極引進、內外聯合、綜合發展」。

呢個工業區係由袁庚領導，早喺1978年佢就先被派到香港參與招商局領導工作，喺同年10月就全面主持招商局工作。去到1978年改革開放啟動，佢當時係蛇口建設總指揮、亦都被稱為「蛇口之父」。喺佢由香港出發到深圳嘅時候，佢就寫咗6句口號，亦都成為後來蛇口發展嘅方針，呢6句就係「時間就是金錢，效率就是生命，顧客就是皇帝，安全就是法律，事事有人管，人人有事管」

雖然袁庚嘅手法後來都引起咗「姓社姓資」爭論，但佢就真係實行咗了蛇口全面改革，具體就有實行超產獎勵制度、實行工程招標、進行住房制度改革、實行職工住房商品化等等，就連鄧小平都話佢嘅政策為中國「衝破思想禁錮的第一聲春雷」。

蛇口面向深圳灣、背靠大南山，既有唔少碼頭，又連接住深港西部通道，區內有住唔少知名企業就好似TCL、三洋電機、中集集團、招商港務等等，目前就已經傾向重點發展金融、現代物流、信息服務。

原圖嚟自網絡