新界六日戰,呢場英國軍隊同埋新界原居民之間嘅「戰爭」,最初因為前景不明、民族情緒等等嘅問題而展開。新界原居民一方分別由屏山及廈村鄧氏、鄧氏喺深圳雁田、懷德嘅近族、大埔七約同埋錦田、十八鄉組成,戰事爆發咗六日,原居民一方死傷500幾人,而係喺吉慶圍就有一個悲慘嘅故事。

新界原居民喺戰事開初其實佔有優勢,但隨住英軍嘅增緩、甚至出動埋火炮,就令到原居民一方節節敗退。錦田嘅原居民就以吉慶圍做據點,同英軍展開血戰,以圍牆、護城河以及著名嘅鐵門防守。由於當時英軍屢攻不下,最後就用到大炮將鐵門同埋圍牆炸開,並攻入圍內,唔少居民死傷。新界六日戰告終,連環鐵門就被英軍拆走送返英國展覽,而犧牲咗嘅鄉勇就被安葬喺逢吉鄉「妙覺園」嘅「英雄祠」。

呢道祖傳鐵門對鄧氏嚟講有住特殊嘅意義,多年嚟都有族人向英國要求歸還,但就次次都索還不果。直到1924年,當時一位比較有威望嘅族人鄧伯裘再重提舊事要求交還鐵門,港府就向英國方面轉達要求,最後鐵門就喺蘇格蘭搵返,並且喺1925年5月26日送返吉慶圍,當時嘅香港總督司徒拔都要嚟親自主禮。如今鐵門就已經重新安裝到吉慶圍,門前亦都有一塊碑文記錄呢段血淚史。

原圖嚟自網絡