斬竹灣抗日英烈紀念碑 入選國家級抗戰紀念設施名錄

尋日就係中國抗日戰爭75周年嘅勝利紀念日，各地都有唔少紀念活動去掉念一眾戰爭中犧牲嘅先烈。喺今年嘅紀念日，國務院亦都公布咗第三批合共80個國家級抗戰紀念設施、遺址名錄，香港嘅斬竹灣抗日英烈紀念碑就入選咗呢個名錄當中。

呢次入選名錄嘅斬竹灣有住特別嘅意義，亦都有住一段不為人知嘅故事。斬竹灣位處西貢，其實喺三年零八個月期間，西貢居民都有積極參與抗日活動，由於西貢地勢有唔少嘅高山同埋海灣，對遊擊隊嚟講相當有利。於是，當時就有一隊因為抗擊日軍而組成嘅港九獨立大隊活躍喺西貢，仲發動過襲擊日軍嘅行動，拯救香港文化人。當時遊擊隊就成功進行多次搶救，戰後西貢仲成立咗港九獨立大隊老遊擊戰士聯誼會」，印證呢隊遊擊隊嘅歷史。

後來，西貢居民為咗紀念呢段歷史，就自資100萬港元興建烈士碑園，碑園入面就埋葬咗當年為抗日而犧牲嘅西貢居民，碑園亦都喺1989年1月落成開放，標誌住西貢居民同抗日歷史嘅密切關係。