【焦點new史】港九獨立大隊三人入選英雄名錄

早幾日就係中國人民抗日戰爭戰爭勝利75周年嘅紀念日，同時亦都係第三批80處國家級抗戰紀念設施、遺址名錄公布嘅日子，而當日其實仲有第三批185名著名抗日英烈、英雄群體名錄公佈，香港嘅港九獨立大隊仲有三人入選添。

呢三個人分別係港九獨立大隊政訓室事務長曾福、港九獨立大隊市區中隊義務交通員馮芝、港九獨立大隊海上中隊班長曾佛新。呢三位英烈都為抗日作出唔少犧牲，曾福就受命入到日本駐沙頭角憲查隊做隊員收集情報，但喺一次對日嘅戰鬥入面佢就帶領遊擊隊面對過千日軍，雖然阻止到敵人進攻，但佢亦都不幸中彈身亡。至於馮芝就係負責傳遞情報，過程中不幸畀日軍發現，經過電刑等酷刑，最於都係被日軍殺害。曾佛新就係黑岩角海面襲擊日軍嘅時候，奮不顧身跳到日軍船上，令到日軍投降，但自己亦都不幸中彈犧牲。

唔使阿史講，大家都會睇到佢哋三個都係同屬一支隊伍，就係港九獨立大隊，呢道真係講開有段故喇！喺香港淪陷冇耐，其實廣東人民抗日游擊總隊就曾經派出過武工隊入到新界，當時呢支部隊就有兩個目的，第一就係想營救香港嘅文化人士，而第二個目的就係開闢香港抗日戰線。於是，喺1942年2月3日，抗日游擊總隊港九大隊就喺西貢黃毛應村一間教堂成立,後來就改名叫做港九獨立大隊。

港九獨立大隊直屬東江縱隊司令部，規模上仲曾經達到成千人，都係由本地人士好似農民、學生同埋海員組成，專門喺新畀一帶活動，曾經聯同過盟軍、英軍服務團合作，營救大批盟軍及國際人士。

原圖嚟自網絡