【講開有段故】「遂公盨」上嘅銘文　令到學者重新考慮一件事？

早排阿史都同大家介紹過大禹治水同埋劃分九州嘅故事，關於呢啲上古故事嘅記載，並冇充足嘅文物或者書籍可以印證到，《尚書·禹貢》入面嘅部分文字都曾經被認為係偽文。直到一件文物嘅出現，先令學者重新考慮呢一點，呢件文物就係「遂公盨」。

「遂公盨」其實唔係通過考古發掘而被發現，反而係喺海外嘅文物市場被發現，所以好多考古嘅線索同埋出土位置都係不明。盨喺古代就係一種由簋轉變而嚟嘅禮器，專門用嚟裝糧食，而呢件盨之所以叫做「遂公盨」，全因銘文入面有「遂公」兩個字，當中呢位「遂公」其實就係西周時遂國嘅國君。

「遂公盨」整體係呈圓角長方形，高11.8厘米，口徑24.8厘米，重2.5千克。器物嘅器口飾鳥紋，腹部飾有瓦紋，兩邊仲有一對獸首形耳，只係垂環同蓋已經唔見咗。「遂公盨」珍貴嘅地方係在於銘文，上面記錄咗上古傳說「大禹治水」，呢段銘文證明咗「大禹治水」嘅故事喺西周時期已經流行，而且早期《尚書·禹貢》曾經被視為係偽書，直到呢件文物嘅銘文「天命禹敷土，隨山浚川，迺差地設征」出現，同《尚書·禹貢》入面嘅「禹敷土，隨山刊木，奠高山大川」內容相近，先到令到當代學者重考慮《尚書·禹貢》嘅參考價值。

原圖嚟自網絡