喺早幾日嘅中國抗日戰爭75周年勝利紀念日入面,除咗將西貢斬竹灣抗日英烈紀念碑列入第三批抗日英烈名錄,原來喺澳門亦都有相關嘅遺址入選呢個名錄,阿史想講嘅就係一座連住花園兩層嘅西式別墅,亦都係澳門政府活化同策展之後整成嘅冼星海紀念館。

咁冼星海同澳門有咩關係呢?原來唔講真係唔知呢位咁犀利嘅音樂家,係 1905年出生喺澳門疍家船工家庭。去到1911年佢就隨住母親去到新加坡,佢當時入讀養正學校,自幼就被老師區健夫發現佢嘅音樂天份,仲將佢帶入學校嘅軍樂隊培養。冇幾耐,冼星海就返到廣洲嘅養正學校升學,去到1926年就去到北京大學音樂傳習所正式修讀音樂,1929年就去埋巴黎學習,展開佢嘅音樂生涯。

咁呢位咁犀利嘅音樂家點解會同抗日救亡運動有關呢?原來喺1935年,冼星海就毅然返到中國,身為音樂家嘅佢當時為抗日救亡運動創作大量戰鬥性嘅群眾歌曲,就好似《救國軍歌》、《只怕不抵抗》、《游擊軍歌》、,仲為電影《壯志凌雲》配樂。而數到佢最出名果首,絕對就係《黃河大合唱》,呢首歌曲更被譽為係「中華民族不朽的英雄樂章」。

1945年,冼星海因為肺結核病逝莫斯科,遺髒喺當地安葬,直到80年代先將骨灰運返廣州。

原圖嚟自網絡