消失的島嶼——牙鷹洲

尋日就同史友們講到青衣橋嘅複製橋葵青橋，咁講起青衣，當然要介紹一個曾經存在過嘅島嶼——牙鷹洲。

如果大家有入青衣呢頭，應該都留意到牙鷹洲公園同埋牙鷹洲街，冇錯，呢兩個地名當中嘅牙鷹洲就係用呢個島嶼命名。喺地理位置上嚟講，牙鷹洲就係位於青衣島嘅東北邊，兩個島之間又有個避風塘，叫做門塘仔；牙鷹洲亦都係荃灣嘅西南邊，中間就係藍巴勒海峽，但牙鷹洲係行政區就被分咗入葵青區。

喺上世紀60到80年代，就咁喺航空相都可以睇到，呢個島嶼被用作油庫，有住唔少巨型嘅油庫建築，真係幾壯觀下！去到80年代初，由於青衣北部同埋青荃橋發展需要填海，當時就決定將牙鷹洲同埋青衣島連埋一齊，令到牙鷹洲唔再係一個島嶼。原本島上嘅位置隨住油庫嘅搬遷，已經被發展成私人屋苑。