【講開有段故】《黃河大合唱》先有詞後有曲?


早幾日就講到位於澳門嘅冼星海紀念館就被列入第三批國家級抗戰紀念設施、遺址名錄,冼星海嘅生平就同大家講唔少,今次就當然要講下佢嘅一首重要作品,亦都係喺抗戰時期鼓舞咗唔少國人嘅歌曲——《黃河大合唱》。


《黃河大合唱》呢首作品真係有唔少故事可以講,要知道冼星海只係負責作《黃河大合唱》嘅曲,詞方面其實係由張光年(光未然)所作。咁到底佢喺邊度嚟嘅靈感可以作得出《黃河大合唱》嘅詞呢?早喺1936年5月,張光年就已經開始創作唔少抗日詩篇,亦都加入唔少工學團負責宣傳工作同埋演劇,期間佢就去過唔少戰區。1938年9月9日,張光年就同劇隊成員搭火車去西安,點知去到陝北嘅途中,就得知武漢已經被日軍攻佔,當時佢非常傷心,望住山下嘅黃河,佢有感而發寫出咗《黃河頌》嘅頭幾句詞,而呢首《黃河頌》後來就成為咗《黃河大合唱》嘅詞。


既然有咗詞,咁首歌又係點樣創作呢?喺1939年1月,張光年騎馬果陣就意外跌斷左臂被送到延安醫治,當時就進一步寫緊《黃河大合唱》嘅歌詞,得知消息嘅冼星海就去到醫院探望張光年,兩人就喺果個時侯決定創作一部大合唱,張光年口授詩句,5日內就創作完成八個段落。冼星海喺聽到呢段詩詞之後,就覺得好感動,用咗6日時間就完成咗譜曲,仲將作品定名為《黃河大合唱》,喺1939年4月13日延安陝北公學禮堂首演。


原圖嚟自網絡