1942年難民船沉沒事件 3,000難民死於非命

喺三年零八個月嘅日子入面發生過唔少人為嘅悲劇，就好似阿史之前介紹過嘅香港居民被放逐到螺洲嘅人食人慘劇，仲有「里斯本丸號」嘅沉船事件，都造成唔少人命嘅傷亡。喺1942年，其實仲有一宗類似嘅沉船慘劇，今次阿史就同大家介紹下啦！

要知道香港本身嘅天然資源並唔多，特別係糧食同埋日常用品都係依賴進口。但係，自從日軍侵佔咗香港之後，唔少交通運輸都中斷，再加上日軍調走唔少香港儲糧做軍事用途，結果就令到香港糧食供應出現問題。因為有以上嘅情況，日軍就以「歸鄉政策」利誘香港居民離開香港，除咗以陸路嘅方式，水路亦都係其中一個主要方法。

喺1942年，唔少人都以坐船嘅方式歸鄉，當年嘅5月9日，日軍就押送咗接近1萬人喺西環分別登上19艘船。上到船之後大部份人都被封閉喺船艙底。但係喺航行無耐就遇上颱風，當時日軍就由得呢啲船隻自行漂流，結果就有14隻船直接沉沒，接近3,000人直接喪生；唔單止咁，就算有難民之後獲救，唔少人都因為饑餓而喺沙灘上餓死，情景相當慘烈。