盆菜起源同文天祥有關？

呢排講開新界六日戰，唔多唔少都會提到圍村，自然就令人諗起一樣新界原居民嘅傳統食物——盆菜。

喺新界嘅傳統村落入面，每逢大時大節好似點燈咁，村內都會有呢種以木盆或銻盆盛載嘅雜燴菜式，即係乜嘢餸都會有啲，好耐之前阿史就已經諗，到底呢種咁特別嘅菜式係點樣發明出嚟。唔講真係唔知，盆菜嘅出現可能係同文天祥有關！

相傳南宋嘅君臣就因為逃避元軍而走難嚟到華南同埋香港一帶，咁文天祥據講就係其中一位，當時佢喺橫渡伶仃洋去到依家深圳一帶，當時嘅村民得知佢係一位忠臣，又見到佢同行嘅將士飢腸轆轆，於是就決定將自己屋企淨低嘅豬肉、魚、蝦、菜等等整埋一齊，等佢哋可以圍住一齊食，呢個就係其中一個關於盆菜嘅起源。至於其他講法都係同南宋君臣有關，另一個講法就係宋帝昺聯同陸秀夫、張世傑等人南逃避難，喺路過東莞縣同埋新界錦田嘅時候，都得到村民款待，由於佢哋人數太多，兩地嘅村民都不約而同咁用盆裝住食物畀佢哋食，所以盆菜就係咁樣命名喇！