又同史友們繼續介紹香港嘅基建設施,如果提到香港第一條行車隧道,相信唔少史友們都答得出係獅子山隧道,但如果係問香港島島上嘅第一條行車隧道呢?答案當然就係香港仔隧道啦!

獅子山隧道嘅第一管道最早就喺1967年就已經通車,但香港仔隧道就冇咁早,反而係要等到1979年先開始動工,兩條嘅管道分別要去到1982年同埋1983年先啟用。喺路段上嚟講,呢條行車隧道就係由黃竹坑連接跑馬地,中間就穿過咗聶高信山,仲用埋黃竹坑舊圍嘅土地,喺南港島線未通車之前,呢條隧道就係南區居民出入港島北部嘅主要通道。

咁點解會去到70年代先開始決定起隧道呢?其實同南區發展有關!去到上世紀60、70年代,南區人口就開始增加,但如果呢班居民想去到黃竹坑、銅鑼灣,路程上就好唔方便,要兜個大圈先至入到去。於是,去到70年代,政府就提倡興建香港仔隧道,幾年之後就已經落成。之不過,早年呢條隧道嘅服務時間只係去到晚上10點30分,所以如果要夜返,都係需要兜個大圈。

原圖嚟自網絡