呢排都同史友們講唔少新界六日戰果陣發生嘅戰事同慘劇，新界鄉勇固然係死傷慘重，但估唔到嘅係，就連九龍寨城都受到呢場戰爭影響！

有關九龍寨城嘅歷史其實最早可以追溯到宋期時期管理嘅「官富場」嘅「官富寨」，而自從1842年香港島落入英國人手中之後，清廷就意識到九龍寨城呢片土地嘅重要性，於是就決心喺1847年擴建九龍寨城，希望可以隔住個維港望住港島。

去到1898年，清廷就同英國人簽訂《展拓香港界址專條》，入面就提到會將九龍以北嘅新界土地租借畀英國，本來當時九龍寨城嘅位置都受到影響，但喺一輪嘅協調之下，雙方都同意將九龍寨城歸清廷管轄，並且城內會由廣州府新安縣大鵬協左營駐防，形式就好似今日嘅領事館咁，但亦都有一個專有嘅稱呼，叫做「外飛地」，意思即係自己國土範圍受到其他國家勢力包圍嘅情況。

咁點解後來九龍寨城又會變成「三不管」呢？原來喺新界六日戰之後，新界鄉勇仍然有反英活動，再加上當時英國方面覺得六日戰係由新安縣官員計劃，所以就派出皇家威爾斯火槍隊同埋100名炮兵義勇軍入侵寨城，將城內官員官兵全數驅趕。寨城一度荒廢，後來又有居民聚居，慢慢發展成「三不管」。

原圖嚟自網絡