早年嘅香港娛樂嘅產物唔多,一本港產嘅漫畫已經好難得,唔知有返咁上下年紀嘅史友又有冇聽過《13點》呢?

《13點》其實係60年代一本好出名嘅漫畫,佢嘅作者李惠珍因病離世,將會喺今個月月尾舉行守靈彌撒。李惠珍早喺1966年就展開創作漫畫嘅生涯,《13點》呢本真係純女性作品,好細緻咁描繪咗香港獨特嘅一面,當中主角13點嘅衣著亦都成為當代少女時裝潮流指標,難怪李惠珍會被稱為「香港少女漫畫始祖」。

對於李惠珍又或者《13點》,史友們可能都有唔少問題,例如就係點解李惠珍會冇啦啦入行。據李惠珍喺一次得獎果陣表示,自己大專一直都係學畫國畫,只係有一次經過教授介紹得到一份漫畫報紙供稿嘅工作,所以就由毛筆轉到鋼筆,投身漫畫行。

李惠珍嘅著作《13點》同樣都係好特別,呢部原創作品好創新咁將時裝元素融入漫畫,再加埋唔少好「少女」嘅情節,觸動咗當年少女嘅心。至於點解叫做13點呢?原來李惠珍媽媽經常用「13點」呢個稱呼叫李惠珍,本身就係一個上海俚語,解做性格鬼馬,玩得出位。原本略帶負面評價嘅呢個叫法,後來就被李惠珍演繹成童話,由第1期去到第28期嘅作品,主角13點一共就有1,728件時裝造型,認真誇張!

原圖嚟自網絡