港府曾計劃收回宋王臺轉售 被一眾清朝遺老上書勸止

早排阿史就介紹到有一位清朝嘅遺老陳伯陶因為對九龍城嘅宋朝遺址好有感觸，仲被勾起身為遺老嘅亡國思緒，所以當佢喺香港定居之後，就對九龍城一帶嘅遺址做咗唔少研究同出記錄，但有一年宋王臺就發生一件大事。

其實早年就已經有唔少人喺宋王臺周邊盜石作為建築材料，當年就係何啟提議立法保留宋王臺用地。去到1915年，當時港府就想收返宋王臺轉售，一知道呢個消息之後，一眾清朝遺老好似陳伯陶太史、賴際熙太史、紳商李瑞琴等等就好大反應，既有四出奔走遊說，亦都有同政府上書陳情勸止，希望將呢片土地轉為保育重地。經過一大輪之後，港府先肯改變呢個土地用途，但就唔會批出資金，亦都唔會做任何工程幫手保育。

結果，富商李瑞琴就自己出錢，喺「宋王臺」三個摩崖大字設石欄繚護，又喺周邊植林、建立涼亭、加設牌坊，令到「宋臺舊址」成為當時香港嘅一個著名景點。陳伯陶仲特此撰寫《九龍宋王臺新築石垣記》慶賀，亦都不時約埋班遺民一齊上山酬唱互答。