呢兩日有單新聞，就係一位內地「紅色文獻」收藏家位於油麻地一個單位俾人入屋行劫，佢報稱損失價值40億元毛澤東字畫同郵票，仲話好傷心同瞓唔著覺。

相信史友們對「紅色文獻」呢樣嘢唔係成日聽到，咁阿史就簡單介紹下。對「紅色文獻」最簡單嘅理解，就係1921年7月中國共產黨成立起至1949年10月新中國建立之前由中國共產黨機關或者各個根據地所出版、發行、製作嘅各種文獻資料。由於呢啲文獻都係新中國成立前嘅產物，所以留存到今時今日嘅「紅色文獻」就更見珍貴。根據內地行業嚟睇，一啲涉及黨領袖人物好似毛澤東、周恩來、鄧小平等人嘅著作，甚至書信呀、黨組織文件呀咁就份外珍貴同值錢。仲有，內地「紅色文獻」收藏家們有「四十年代的常見，三十年代的少見，二十年代的罕見」嘅講法。亦基於政治信仰，所以內地唔少人都收藏紅色文獻，價格亦不斷上漲。

原圖嚟自網絡