早排阿史就同大家介紹到近代中國嘅一位傳奇人物,「中國氫彈之父」于敏,佢嘅名因為早年情報管制嘅問題而被封鎖,全國基本上冇乜人知道于敏呢個名,而喺相近嘅時代背景之下,仲有一位感動唔少中國人嘅傳奇人物,佢叫做林俊德。

林俊德出生喺1938年嘅福建,喺1960年就畢業喺浙江大學機械系,早年就去過國防科委從事研究同埋去過哈爾濱中國人民解放軍軍事工程學院進修,但就因為一件事改變咗佢命運,甚至生命中有幾十年時間都係默默無聞。林俊德喺1964年開始,就參與中國嘅核試驗,佢長期就係從事空中爆炸衝擊波、爆炸地震波、地下爆炸岩體應力波方面嘅研究。喺佢帶領之下,項目組解決咗好多難題,亦都測量到核爆炸衝擊波參數,為中國核試驗帶嚟好重大嘅改變,佢就喺1993年晉升少將軍階,由於長期守護喺羅布泊,所以佢又被稱為大漠將軍。去到1996年,佢就參與晒中國全部45次嘅核試驗。

林俊德嘅故事唔單止係喺核試驗場,2001年佢就當選中國工程院土木、水利與建築工程學部院士、擔任解放軍總裝備部第21試驗訓練基地研究員,繼續從事研究同埋教育工作。而佢最感動中國國民嘅事就係,喺2012年5月31日,喺佢因為膽管癌逝世前嘅幾個鐘,佢並冇安然咁喺床上度過,反而9次要求醫生畀佢落床完成報告,佢話呢個係佢最後嘅願望。結果係眾人攙扶之下行到電腦嘅位置完成研究報告同埋批改學生論文,喺離世前嘅一刻仍然記住國家嘅研究同埋學生,呢一幕被媒體錄低晒,《一位院士的最後時刻》畫面傳遍大大小小網站,感動無數中國人。

原圖嚟自網絡