日佔時期每家都要影「全家福」？

呢排香港就有學者企圖想將日本佔領香港所做嘅事洗白，當中提及到磯谷廉介嘅作風「冇去到最盡」。尋日阿史就簡略咁講過下日本軍政府做過啲乜，今次就想介紹下「全家福」呢個規定。

喺日本侵佔香港嘅三年零個八月入面，日軍有唔少特權，同時亦都有唔少規定。聽到最多嘅當然就有強迫婦女做慰安婦、要求市民見到日軍嘅時候要90度鞠躬、而「全家福」呢個規定就真係最嚴重，分分鐘可以招來殺身之禍。日軍就因為將香港嘅儲糧強行充公做晒軍糧，喺香港就推行咗「歸鄉政策」同埋糧食配給制度，為咗減輕人口負擔，每位喺香港居住嘅居民都需要有一張「居民證」，先至有可能唔會畀日軍趕走。咁「全家福」又係咩回事呢？

當時日軍就要求所有家庭都要影一張有全家嘅相，當日軍一查戶口果陣如果發現有咩屋企人唔喺度，就會直接被當成係窩藏游擊隊成員又或者協助相關嘅活動，被懷疑嘅家庭輕則就會受到拳打腳踢、重則就係殺身之禍，一張「全家福」嘅代價真係可以好大。