尋日就係日本侵華嘅序幕「九一八事變」嘅日子,講起呢段令人傷感嘅歷史,相信唔少史友們都會諗起大大小小嘅戰役,就好似「華北事變」、「七七事變」等等。而喺「九一八事變」開始講起嘅話,「一二八事變」就一定要同大家介紹下!

喺「九一八事變」嘅時候,當時中國守軍係採取咗「不抵抗政策」,東北軍基本上無辨法阻止到日軍侵略,但呢一點嚟到「一二八事變」就有所變化。有史學家就形容,「九一八事變」嘅「不抵抗政策」某程度上助長咗日軍侵略嘅野心,於是喺1932年1月28日,日軍就喺上海不斷挑起事端向上海閘北區、虬江路、青雲路等地進犯,呢次中國守軍就唔再係「不抵抗」,而係奮起抵抗,爆發史稱呢場「淞滬抗戰」嘅守衛戰。

去到同年2月1日,日軍就派出軍艦砲轟南京,政府人員同埋各界領袖就已經開始去到洛陽會商,淨係得返軍政負責人留低。成場「一二八事變」由1月28日去到3月3日,守軍不斷增援,而日軍亦都三度增兵、四度更換主帥,前後以十萬兵力、再加上飛機、軍艦轟炸,令到守軍後援不繼,只好由蔣光鼐、蔡廷鍇等人發表撤退通電。

戰事歷時33日,隨住日軍佔領真如、南翔宣布停戰,5月5日雙方亦都簽訂《淞滬停戰協定》五款,將上海為非武裝區;規定中國在上海至蘇州、崑山地區無駐兵權;日本在該地區則可以駐兵等。雖然呢次守軍戰敗,但都建立咗一定嘅士氣,並且令到全國掀起支援抗戰嘅熱潮。

原圖嚟自網絡