相信史友們都知道，中國領土/領海係去到南中國海。阿史以前都介紹過點解「南中國海自古以來都係中國的」，今次就想講講地理，就係中國領土最南端响邊度。

講講歷史先，早於三國時代就有關於南海島礁嘅文字記載，之後唐宋時期海上交通發達，時人對南海嘅地理環境有更多嘅記載。响清朝光緒年間，清政府派咗支艦隊環繞南海一周，仲响各個海島上豎立界碑，確定咗國家領土範圍。到咗民國年代，南京政府就根據清政府响南海所劃定嘅國境線，即係「十一段線」。後嚟中華人民共和國成立，就按照中華民國所劃定咗南海領海範圍定為國界，不過就將「十一段線」中北部灣嘅兩段唔要，成為今日嘅「九段線」。

講到呢度，咁究竟中國領土最南端係邊度呢？唔少教科書都會寫係曾母暗沙。曾母暗沙係一座位於南海、終年唔露出水面嘅海底暗沙，被視為南沙群島嘅一部分。响1994同2009年，中國對曾母暗沙投下主權碑。不過，另一個講法係話中國領土實際最南端係瑪麗淺灘，瑪麗淺灘屬於中國南沙群島水下嘅暗礁，距離曾母暗沙東南約35公里處。咁點解一時又話曾母暗沙係最南端，一時又話係瑪麗淺灘。其實呢個只係對曾母暗沙唔同理解所致，因為廣義上瑪麗淺灘算係曾母暗沙範圍以內，但狹義上又唔屬於曾母暗沙主體部分，所以先有呢個分歧。

原圖嚟自網絡