提到香港最早嘅行車隧道,相信史友們都會知道係獅子山隧道;如果再問埋,最長嘅雙線行車隧道,可能有史友都會答到係大老山隧道,但如果數到最長嘅三線行車隧道呢?

今次阿史就想同大家介紹下大欖隧道,大欖隧道雖然係香港最長嘅三線行車隧道,但其實如果真係計長度,管道全長3,800米嘅大欖隧道都只係可以排喺第三位。呢條隧道喺1995年5月由多間集團組成嘅三號幹線有限公司集資興建,喺1998年建成,接近73億嘅建造成本換嚟30年嘅專營權。

呢條隧道係新界西重要嘅交通要道,當初興建佢嘅目的就係想紓緩屯門公路同埋青山公路的交通負荷,並且希望通過呢條穿過在青朗公路、三號幹線嘅隧道,可以拉近元朗、機場同埋市區之間嘅距離。大欖隧道既可以由南端汀九橋及屯門公路出發,又可以去到八鄉、錦田、新田及元朗等幾個地方,都算係四通八達。

而喺呢條隧道建成之後,市民出入荃灣、九龍又或者港島都唔再需要兜個大圈入去青山公路或者屯門公路,而係可以直接行大欖隧道,都幾方便下!

原圖嚟自網絡