日軍進攻山海關 中國守軍抵抗兩晝夜殉國

喺「九一八事變」、「一二八事變」之後，東北三省大片土地落入日軍手中，而上海被劃定為非武裝區、中方喺上海至蘇州、崑山地區無駐兵權，日軍亦都喺瀋陽成立埋係滿洲國，總之抗日戰爭嘅形勢就相當唔好，冇幾耐仲爆發埋長城戰役。

日軍以熱河省地方官員表示歸附滿洲國為理由，帶同滿洲國軍隊先到熱河，點知當時省長湯玉麟帶同二百幾架車裝上金銀財寶、鴉片等不戰而逃，走佬去天津，結果日軍就只係憑住128名騎兵占領承德。

眼見咁嘅情況，日軍就喺1933年1月1日順勢進攻山海關，當時就指係中國軍隊對佢哋開槍，並要求中國軍隊撤出山海關。咁中方當然係抗拒，隨即就展開兩晝夜激戰。日軍派出航空兵同埋海軍炮轟山海關，由於雙方裝備差太遠，最後何柱國所部安德馨營全部殉國，山海關就喺1月3日被攻陷。