好耐之前阿史就已經同史友們介紹過幾條中國第一條嘅鐵路，就好似第一條清政府主張興建嘅官辦鐵路——唐胥鐵路、第一條民營鐵路潮汕鐵路等等，但如果真係純粹計第一條鐵路，史友們又知唔知係邊條呢？

阿史想介紹嘅就係德小鐵路，呢條鐵路名乎其實真係規模好細，而且起好咗冇幾耐就被下令拆除，到底當中有咩原因呢？德小鐵路其實就係喺1865年由英國商人杜蘭德喺北京和平門同埋宣武門出面，沿住條護城河興建嘅一條小鐵路。當年呢條小鐵路全長就只有500米，上面有住一架小型蒸汽機車做展覽。如果唔計長度、唔計實用性，呢條就真係中國最早嘅一條鐵路。

之但係，呢條鐵路起好冇幾耐，清廷嘅步軍統領衙門就以「見者詫駭，謠諑紛起」為由，要求呢位商人移除鐵路，就係咁第一條鐵路好快就消失喇！可能史友們都會想知，到底當時嘅人係點睇呢條鐵路呢？

李端瑞《參冰室野乘》入面就有記載「同治四年七月，英人杜蘭德以小鐵路一條，長可裡許，以小汽車馳其上，迅疾如飛。京師人詫所未聞，駭為妖物，舉國若狂，幾致大變」，所以清廷就咁快落咗拆除嘅決定喇！

原圖嚟自網絡