尋日阿史就講到日軍以熱河省地方官員表示歸附滿洲國為理由,先佔領咗熱河,繼而進攻山海關。中國守軍喺兩日兩激戰之後殉國,山海關就此失守。

日軍嘅野心唔單止喺山海關,仲想進一步入侵中國,於是就喺1933年3月12到24日,以長城隘口喜峰口一帶爆發戰役,呢場亦都係抗日戰爭早期重要嘅戰爭之中。

日本方面就由關東軍嘅師團出擊,中國守軍退到東起冷口,西至馬蘭峪一線防守,由宋哲元、馮治安、張自忠、劉汝明等人分別喺義院口、冷口、喜峰口、古北口憑險固守。戰事早期守軍裝備就比唔上日軍,喜峰口更加被日軍搶佔,當時佢哋諗到取勝嘅方法就只有奇襲。

中國守軍由趙登禹接命,挑選500名士兵組成「大刀隊」,帶同大刀同埋手榴彈, 3月11日深夜由當地獵戶關仁景、於連貴帶路偷襲日軍軍營。呢次戰術相當成功,一夜之間有過千日軍傷亡,奪取到日軍陣地之餘,仲得到坦克11輛、裝甲車6輛、大炮18門等。只係,500人嘅「大刀隊」最後只係得返23人生還,相當慘烈!守軍亦都乘機夜擊日軍,重奪喜峰口,再包抄日軍。

早期日軍嘅騎兵、炮兵部隊好少戰敗,但呢次慘敗就傳到返日本,當年《朝日新聞》就形容係「明治大帝造兵以來,皇軍名譽盡喪於喜口峰外,而遭受六十年來未有之侮辱。」

原圖嚟自網絡