中國點解係聯合國常任理事國？

今年係聯合國成立75周年，國家主席習近平仲响聯合國成立75周年紀念峰會上發表視像講話。唔經唔覺，聯合國都成立咗咁耐。

相信史友們都應該知道中國係五個常任理事國之一，全世界咁多個國家都係得五個國家有呢個地位，咁點解中國會佔其中一席呢？呢個要從二戰時講起。响1943年德黑蘭會議時，美國同蘇聯領袖就想建立一個新嘅國際組織，响戰後維持全球秩序，而呢個組織會類似國聯但好多方面又會比國聯更強大同更具影響力。就係咁，呢個構思出嚟嘅國際組織就係1945年戰後成立嘅聯合國。响1945年2月，歐洲戰事進入最後階段，英國、美國、蘇聯就發表聯合聲明，定响4月25日喺三藩市召開聯合國國際組織會議，並決定管制德國辦法。最重要嘅係，各國建議中國同法國成為三藩市會議發起國。中國同法國之所以有咁嘅地位係因為佢哋都係當時反法西斯同盟嘅國家。响1945年6月26日，三藩市會議結束，各國簽署《聯合國憲章》，憲章就响1945年10月24日正式生效，聯合國亦正式成立。

至於中國，唔單止係聯合國創始會員國，按《聯合國憲章》規定成為五個聯合國安全理事會常任理事國之一。