喺二戰時期嘅歐洲,有唔少文物都難逃一劫,被戰火所摧毀,亦都有啲文物得到好心人嘅保護,而今次阿史想介紹嘅呢個隋朝佛首,就係有住一個你估都估唔到嘅故事。

隋朝佛首到底點解會去咗歐洲,就真係冇人知喇,但由知道嘅事講起先!收藏呢個隋朝佛首嘅人叫做David Weill,係一個1871年出生喺美國嘅猶太人,由於佢成個家族都係喺歐洲生活,所以佢冇幾耐就返到佢父母嘅故鄉法國繼續讀書同埋從軍,後來仲接管埋家族嘅金融諮詢公司Lazard Ltd。

做咗銀行家嘅佢對藝術品都好有興趣,由西方畫像、金銀器再去到宋代瓷器、高古玉都有收藏,隋朝佛首就更加係其中之一。本來一切都相安無事,但去到1940年納粹德軍就對猶太人展開追捕,巴黎淪陷後就有13,000多名猶太居民被拘捕。雖然David逃過一劫,但佢嘅收藏品就落入咗德軍「羅森柏格特別行動組」(ERR)手中。據估計佢一共有成2,687件藝術品,數量只係僅次羅斯柴爾德(Rothschild)家族。

呢啲藝術戰時就一直被收藏喺羅浮宮地庫、國立網球場現代美術館、甚至德國國境,但後來就因為Rose Valland而令到大部分藝術品都可以送返去原有者手上。隋朝佛首1946年就被送返去David手中,直到1972年佢過身之後先被拍賣,轉輾之下由「中國古董教父」Eskenazi、芝加哥收藏家James and Marilynn Alsdorf收藏,而今日亦都會喺紐約佳士得「阿爾斯多夫珍藏」專場拍賣。

原圖嚟自網絡