早排就同史友們介紹開青衣南橋嘅歷史,呢條橋嘅出現唔多唔少都係因為葵涌貨櫃碼頭嘅車流量,既然講開,阿史就同大家介紹埋葵青貨櫃碼頭啦!

葵青貨櫃碼頭,以前就叫做葵涌貨櫃港,佢所在嘅位置就係葵青區藍巴勒海峽一帶,下葵涌、青衣及昂船洲一帶沿岸,一共就有九個貨櫃碼頭,分成24個泊位共7,804米深水岸線,足以停泊到世上最大嘅貨櫃船,亦都可以喺一年之內處理到1,900萬個標準貨櫃單位。

咁呢個貨櫃到底係幾時出現,又係點解出現呢?喺葵青貨櫃碼頭未出現之前,香港嘅貨運物流主要係由尖沙咀九龍倉碼頭負責,但隨住上世紀50年代標準尺寸嘅貨櫃出現之後,當時港府就喺1969年打算喺葵涌建設香港專用嘅貨櫃港,頭三個碼頭就喺1970年填海興建,四號、五號、六號、七號碼頭就分別喺1976年、1988年、1989年同埋1990年建成,2003年仲起埋九號碼頭,認真誇張!

雖然近年佢嘅貨流量、吞吐量都不斷下跌,但佢喺1992年到2004年間曾經係全球最繁忙嘅貨櫃港口,現時就估計係全球第八大貨櫃港,主要係處理香港同埋珠三角嘅貨櫃物流。

原圖嚟自網絡