新界六日戰嘅歷史就同大家講咗一排，而呢場戰爭相關嘅建築當然就唔止八鄉古廟同埋忠烈祠等等嘅中式建築啦，就連一啲現代化嘅建築都係因為咁而出現，阿史想介紹嘅就係舊屏山警署喇！

舊屏山警署喺1899年4月22日落成，係新界少有嘅戰前警署。成個警署由三座建築物組成，主樓係一座拱形長廊雙層建築、同北面嘅附翼大樓連接、可以睇到鄰近嘅鄧氏宗祠、聚星樓。

至於點解會喺屏山興建警署呢？喺1898年英國就向清廷租借新界，但喺嘗試接管新界土地嘅期間，就同新界鄉勇發生多次武裝衝突，屏山就更加係主要嘅戰場之一。眼見咁嘅情況，當時港府決定要喺屏山起興建呢座警署維持治安，作為新界西北嘅警察根據地。

到咗1965年，元朗分區警署落成之後，舊屏山警署嘅職能就被取代，一度被改為警犬隊總部訓練中心；去到1997年，呢座建築物就達成協議，將會改建為屏山鄧族文物館，先喺2002年由康文署、建築署管理同維修，2007年4月15日正式開放，內部就有展示鄧族發展歷史與民風習俗嘅展覽，又有介紹文物徑嘅資訊，大家行過路過就真係唔好錯過喇！

原圖嚟自網絡