香港第二大華資百貨公司——永安百貨

冇幾耐之前阿史就同史友們介紹過香港第一間華資百貨公司先施百貨，呢間公司亦都係早年香港規模最大嘅一間百貨公司。有返咁上下年紀嘅史友都知道，當年曾經係有四間由澳洲歸僑開辦嘅「後四大公司」嘅叫法，咁今次阿史就同大家介紹下第二間百貨公司，永安百貨。

如果要追溯永安百貨，其實最早就可以數到去郭標、郭樂、郭泉1897年喺澳洲創立嘅「永安公司」，但早年就唔係賣百貨，而係賣下堅果、茶葉、米等等嘅糧油雜貨。而去到1907年6月28日，呢幾位香山華僑就選擇到香港定居，受到先施百貨嘅啟發，郭樂郭泉兩兄弟就決定喺德輔道中107－235號創立第一間香港嘅「永安公司」，即係當年先施百貨附近。

既然稱得上係第二大華資百貨公司，當然係有返咁上下規模啦！永安百貨曾經就有唔少分店。70年代去到90年代可以話係百貨業嘅高峰期，70年代銅鑼灣波斯富街、80年代灣仔合和中心分店、90年代旺角彌敦道分店，就連荃灣、中環、香港仔、黃埔都曾經有過永安百貨，就咁睇啲地段都知道當年呢間公司係幾巴閉！只係隨住日資百貨嘅百花齊花，唔單止係永安，就另外三大百貨都開始衰落，目前永安百貨就只係得返四間分店。