早幾日阿史就介紹到一件近排登上紐約佳士得「阿爾斯多夫珍藏」專場拍賣會嘅隋朝佛首，而同樣喺九月早前亦都賣出咗一件幾受文界注目嘅器物，就係康熙文房「八大碼」。

由細聽到大都係聽過「文房四寶」，呢次拍賣真係長知識，原來仲有「八大碼」嘅存在。呢次拍賣嘅器物入面，「八大碼」都唔係屬於太罕見，真正罕見嘅係呢套器物係屬於豇豆紅嘅釉色，就算係康熙年間都係可遇不可求。豇豆紅呢隻顏色並唔係咁輕易可以燒製到出嚟，喺瓷業百花齊放嘅宋朝都好難見到，直到康熙盛世先至喺景德鎮御窯廠比較多出產。

呢幾隻豇豆紅「八大碼」唔係咁簡單燒製到，係需要極高溫度先至整到，當中係以康熙時期新創「吹紅」嘅工藝，將釉吹到瓷坯表面，要吹足十幾層先至成色。由於每層釉極薄，再加上高溫，好多時候都會失敗令到乜色都冇、又或者變咗做綠色、又或者又紅又綠。燒得比較靚嘅會叫做「美人醉」、差少少嘅就叫做「孩兒面」或「桃花片」，由於太過罕有，大家基本上只會喺官廷入面先見到。

所謂「八大碼」，就有「太白尊」、「蘋果尊」、「萊菔尊」、「菊瓣瓶」、「蟠螭瓶」、「柳葉瓶」、「銅鑼洗」、「印盒」為之一套，但要見齊一套又係相當之難，就算近排呢次拍賣入面，都只係得五件，真係珍品之中嘅珍品啊！

原圖嚟自網絡