近年全國各地都開展唔少考古發掘嘅工作,公眾亦都因為咁而有機會睇到古代唔少珍品,其中一件阿史想介紹好耐嘅文物就係「金縷玉衣」!
雖然細個果陣吟詩都會聽到「勸君莫惜金縷衣,勸君惜取少年時」,但呢個「金縷衣」同阿史想介紹嘅「金縷玉衣」就好唔同喇!「金縷玉衣」毫無懸念就係一種喪葬殮服,專門畀漢朝皇帝與王公皇妃所用,主要喺西元前200年至200年間流行。
金縷玉衣睇落就係一個人形,但當中工藝都有唔少複雜嘅地方。呢類衣物主要由大量片狀嘅玉石組成,仲要根據人體調較唔同角度形狀,視乎死者嘅身份再以金絲、銀絲或銅線串起玉片,只有用金絲鉤成嘅先至會叫做「金縷玉衣」。一件正常尺寸嘅玉衣,係可以用上接近3,000塊玉片同埋1,100克黃金,近年中山靖王劉勝、南越國文帝趙眜嘅金縷玉衣都相當有睇頭。
咁點解好地地會整呢種玉衣出嚟?原來古人,特別係漢朝嘅古人,深信玉石有住防腐功能,佢哋亦都相信穿著金縷玉衣、封住「九竅」可以保住人嘅靈魂,有更好嘅來世。之不過,防腐嘅功效就未如理想,咁貴重嘅衣物就反而引嚟唔少盜墓賊喇!
原圖嚟自網絡